काठमाडौं। नेपाल वायुसेवा निगमले हालैको बाढी र प्राकृतिक विपद्बाट प्रभावित नागरिकका लागि विदेशबाट पठाइने राहत सामग्रीको हवाई ढुवानी शुल्कमा पूर्ण छुट दिने निर्णय गरेको छ। निगमले आफ्नो संस्थागत सामाजिक उत्तरदायित्व अन्तर्गत यो सुविधा उपलब्ध गराएको हो।
निगमका अनुसार अन्तर्राष्ट्रिय स्टेसनबाट पठाइने राहत सामग्रीमा लाग्ने ढुवानी शुल्क एक महिनाका लागि पूर्ण रूपमा मिनाहा गरिएको छ। यस सुविधा अन्तर्गत खाद्यान्न, औषधि, लत्ताकपडा र अन्य अत्यावश्यक राहत सामग्रीको ढुवानी गरिनेछ।
यो छुट सुविधा प्राप्त गर्न सम्बन्धित मुलुकमा रहेको नेपाली दूतावाससँग समन्वय गर्नुपर्नेछ। दूतावासबाट प्राप्त आधिकारिक पत्रका आधारमा मात्र राहत सामग्रीको ढुवानीमा शुल्क छुट दिइने निगमले स्पष्ट पारेको छ।
विपद्को समयमा मानवीय सहयोगलाई सहज र थप प्रभावकारी बनाउने उद्देश्यले यो निर्णय गरिएको हो। निगमले यस व्यवस्थाबाट विभिन्न मुलुक तथा संघसंस्थाबाट नेपाल पठाइने राहत सामग्री प्रभावित समुदायसम्म छिटो र सहज रूपमा पुग्ने विश्वास व्यक्त गरेको छ।
