काठमाडौं। चितवनसहित विभिन्न जिल्लाका ग्यास उद्योगले राजधानीमा एलपी ग्यासको आपूर्ति बढाएका छन्।
चितवन, नवलपरासी (बर्दघाट-सुस्तापूर्व), मकवानपुर, बारा, पर्सा र धनुषामा रहेका उद्योगहरूले दैनिक १४ घण्टासम्म बोटलिङको काम गरिरहेका छन्।
नेपाल एलपी ग्यास उद्योग सङ्घका सदस्य विमल कालाखेतीका अनुसार चितवनको बाबा, साइबाबा, नेपाल ग्यास गण्डकी, नवलपरासीको जानकी तथा धनुषाको नेपाल ग्यास र नारायणीले दैनिक दुई सिफ्टमा १५ हजार सिलिन्डर भरिरहेका छन्। यी प्लान्टहरूले २४ वटा उपकरणमार्फत प्रतिमिनेट २४ सिलिन्डर भर्ने क्षमताका साथ काम गरिरहेका छन्।
त्यसैगरी, धनुषाको नोबेल, बाराको वान (एनएल), जगदम्बा, लियो, अम्बर ग्यास, पर्साको सुप्पर, मनोज, मकवानपुरको साहरा र नवलपरासीको चन्डेश्वरी ग्यास उद्योगले दैनिक १० हजार हाराहारी सिलिन्डर भरिरहेका छन्। उत्पादित सिलिन्डरमध्ये आधा स्थानीय बजारमा र बाँकी काठमाडौँ पठाइने गरिएको छ।
कालाखेतीले ट्रक व्यवस्थापनदेखि ग्यास बुलेटको आपूर्ति र बोटलिङसम्मको काममा सबै उद्योगीहरू सक्रिय रहेको बताउनुभयो। हाल काठमाडौँ उपत्यकामा दैनिक ४० हजार सिलिन्डरको माग हुने गरेकोमा अहिले माग बढेर करिब एक लाख पुगेको छ। बुधबार मात्रै ५३ हजार ४६९ सिलिन्डर काठमाडौँ पठाइएको थियो।
चितवनमा भरिएका सिलिन्डर हेटौँडा हुँदै काठमाडौँ पुर्याइने गरिएको छ। यद्यपि, साँघुरो सडक, सवारी साधनको उच्च चाप र पटक-पटक खस्ने पहिरोका कारण ढुवानीमा कठिनाइ भइरहेको छ।
