बुटवल। बुटवलका व्यवसायी तथा सामाजिक अगुवा थानेश्वर पौडेलले बाढी प्रभावित नागरिकको राहतका लागि २५ लाख २५ हजार रुपैयाँ सहयोग गरेका छन्।
गत भदौ १० गते भोटेकोशी नदीमा आएको बाढीबाट प्रभावित विभिन्न जिल्लाका नागरिकलाई सहयोग पुर्याउने उद्देश्यले पौडेलले उक्त रकम प्रधानमन्त्री दैवी प्रकोप उद्धार कोषमा जम्मा गरेका हुन्।
मानव धर्म सेवा समिति बुटवलका स्वयंसेवी र शाइन रेसुंगा डेभलपमेन्ट बैंकका अध्यक्षसमेत रहेका पौडेलले व्यक्तिगत रुपमा सो रकम प्रदान गरेका हुन्।
उनले राष्ट्रिय विपत्तिको यस घडीमा नागरिक दायित्व बोध गर्दै सहयोग गरेको बताए। पौडेलले भने, ‘दुखको समयमा एक नेपालीले अर्को नेपालीलाई राहत पुर्याउनु नै सच्चा मानव धर्म हो।’
उनका अनुसार रसुवा, धादिङ र नुवाकोट लगायतका जिल्लामा आएको बाढीले मुलुकले ठूलो क्षति व्यहोर्नु परेको छ। यसअघि नै आफू अध्यक्ष रहेको शाइन रेसुंगा डेभलपमेन्ट बैंकले सोही कोषमा ६५ लाख रुपैयाँ जम्मा गरिसकेको उनले जानकारी दिए।
