काठमाडौं। गरिमा विकास बैंकले भोटेकोसी नदीमा आएको बाढीबाट प्रभावित नागरिकको उद्धार, राहत तथा पुनःस्थापनाका लागि १ करोड १ लाख ११ हजार १ सय ११ रुपैयाँ सहयोग गर्ने घोषणा गरेको छ।
बैंकले प्रभावित क्षेत्रमा राहतका लागि उक्त रकम उपलब्ध गराउने प्रतिबद्धता जनाएको हो। बैंकका अनुसार कर्मचारीहरूको एक दिनको तलब र भत्ताबापत संकलित १६ लाख २० हजार ५ सय ५० रुपैयाँ तथा बैंकको तर्फबाट ३४ लाख ९० हजार ५ सय ६१ रुपैयाँ गरी कुल ५१ लाख ११ हजार १ सय ११ रुपैयाँ प्रधानमन्त्री दैवी प्रकोप उद्धार तथा राहत कोषमा जम्मा गरिएको छ।
यसका अतिरिक्त बैंकले संस्थागत सामाजिक उत्तरदायित्व कोषबाट स्थानीय निकायसँगको समन्वयमा शिक्षा, स्वास्थ्य र नागरिकको पुनःस्थापनासम्बन्धी कार्यक्रमका लागि थप ५० लाख रुपैयाँ बराबरको प्रत्यक्ष सहयोग गर्ने जनाएको छ।
बैंकले १० भदौमा भोटेकोसी नदीमा आएको बाढीबाट प्रभावित नागरिकप्रति समवेदना प्रकट गर्दै घाइतेहरूको शीघ्र स्वास्थ्यलाभको कामना गरेको छ। विपत्तिको यस कठिन घडीमा प्रभावित नागरिक, स्थानीय समुदाय, सरकारी निकाय र अन्य सरोकारवालाबीचको सहकार्यले राहत र पुनर्निर्माणका काम थप प्रभावकारी हुने बैंकले विश्वास व्यक्त गरेको छ।
