काठमाडौं। नुवाकोटको विदुर नगरपालिकाले भोटेकोशी र त्रिशूली नदीमा आएको बाढीले क्षतिग्रस्त सडक र पुलहरूको विकल्पमा त्रिशूली नदीपारिको क्षेत्र जोड्ने सडक स्तरोन्नति गर्न ५० करोड रुपैयाँको प्रस्ताव गरेको छ। नगर प्रमुख राजन श्रेष्ठले मंगलबार सडक डिभिजन कार्यालय, विदुरलाई पत्र पठाउँदै उक्त वैकल्पिक मार्गको स्तरोन्नति गर्न माग गरेको हो।
भदौ १० गतेको बाढीले मुख्य सडक र पुलहरूमा क्षति पुर्याएपछि हाल सञ्चालनमा रहेको एकमात्र वैकल्पिक मार्ग साँघुरो र जोखिमपूर्ण बनेको छ। नागरिकको आवागमनमा भइरहेको समस्यालाई मध्यनजर गर्दै नगरपालिकाले वैकल्पिक सडकको स्तरोन्नति योजना अघि सारेको हो।
प्रस्तावित सडक छत्रखोलाबाट सुरु भई सिर्खौली, रणभुवनेश्वरी, मान्त्रेढुङ्गा, गौरिवेशी, कालीखोला, माझीगाउँ, कोलनी, आंगापुटार, तुप््चे, भित्रीनीटार र सिस्नेचौर हुँदै च्याम्पेधारासम्म पुग्नेछ। यस योजनामा नगरपालिकाका वडा नम्बर १, ३, ६, ७, ८, ९ र १२ का क्षेत्रहरू समेटिएका छन्। नगरपालिकाले विस्तृत लागत अनुमानसहितको विवरण सडक डिभिजन कार्यालयलाई बुझाएको जनाएको छ।
