काठमाडौं। अमेरिका र इरानबीचको द्वन्द्वका कारण विश्व बजारमा इन्धन आपूर्ति प्रभावित हुँदा पेट्रोलियम पदार्थको मूल्य आकासिएको छ । कच्चा तेलको मूल्य प्रतिब्यारेल १०० अमेरिकी डलर नाघेपछि यसको प्रत्यक्ष असर यातायात, कृषि र उद्योग क्षेत्रमा परेको छ।
सिरियामा डिजेलको मूल्य ४० प्रतिशत र ग्यासको मूल्य २५ प्रतिशतभन्दा बढीले बढेपछि राष्ट्रपति बसर अल-असदको शासनविरुद्ध ठूला प्रदर्शन भएका छन्। प्रदर्शनकारीले राजमार्ग अवरुद्ध गर्दै सरकारी अधिकारीको राजीनामा माग गरेका छन्।
ग्वाटेमालामा पनि इन्धनको मूल्य नियन्त्रण गर्न ट्रक चालक र आदिवासी समूहले सडक आन्दोलन गरेका छन्। त्यहाँको संसद्ले वर्षको अन्त्यसम्म मूल्यमा सीमा तोक्ने प्रस्तावमाथि छलफल गरिरहेको छ।
पोर्चुगलको एस्पिन्होमा व्यवसायी र श्रमिकले मूल्यवृद्धिविरुद्ध प्रधानमन्त्रीको निवास अगाडि प्रदर्शन गरेका छन्। सरकारले यातायात र अग्नि सेवालाई लक्षित गरी राहत प्याकेज घोषणा गरेको छ।
फ्रान्सको फोस-सुर-मेरमा माछा व्यवसायीले इन्धन डिपोमा नाकाबन्दी गरेका छन्। व्यवसाय सञ्चालन कठिन भएको भन्दै उनीहरूले सरकारको तत्काल ध्यानाकर्षण गराएका छन्।
फिलिपिन्समा यातायात मजदुरले इन्धनमा अनुदान र कर कटौतीको माग गर्दै हडताल गरेका छन्। मनिलामा विद्यार्थी र मजदुरले महँगीविरुद्ध प्रदर्शन गरिरहेका छन्। ऊर्जामन्त्री शेरोन एस गारिनले इन्धनको मूल्यवृद्धिले दैनिक बजेट र व्यवसाय सञ्चालन खर्चमा गम्भीर असर पारेको बताएकी छन्।
विश्वव्यापी रूपमा फैलिएको यो ऊर्जा संकटले कम आय भएका देशका नागरिकको दैनिक जीवनयापन कष्टकर बनाएको छ। तेल आयातमा निर्भर मुलुकहरूमा व्यापार घाटा र सरकारी खर्चको दबाब बढ्दै गएको छ।
