काठमाडौं। साओमी नेपालले रसुवामा बाढीबाट प्रभावित परिवारका लागि २०० सेट अत्यावश्यक घरायसी सामग्री सहयोग गरेको छ। ‘साओमी फर कम्युनिटी’ अभियानअन्तर्गत कम्पनीले उक्त राहत सामग्री काठमाडौंका प्रमुख जिल्ला अधिकारी ईश्वरराज पौडेललाई हस्तान्तरण गरेको हो।
कम्पनीका अनुसार प्रत्येक राहत सेटमा एकवटा प्रेसर कुकर, एकवटा कराइ, पाँचवटा प्लेट, पाँचवटा चम्चा, ६ वटा कप, पाँचवटा कचौरा र एकवटा थर्मस बोतल रहेका छन्। यसअनुसार कुल २०० वटा प्रेसर कुकर, २०० वटा कराई, एक हजार वटा प्लेट, एक हजार वटा चम्चा, एक हजार २ सय वटा कप, एक हजार वटा कचौरा र २०० वटा थर्मस बोतल वितरण गरिएको छ।
बाढीपहिरो प्रभावित परिवारको दैनिक जीवनमा सहजता ल्याउने उद्देश्यले भान्सामा आवश्यक पर्ने सामग्री सहयोग गरिएको कम्पनीले जनाएको छ। साओमी नेपालले यसअघि नै रसुवा बाढीबाट प्रभावित नागरिकको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा २० लाख रुपैयाँ सहयोग गरिसकेको छ। पछिल्लो सहयोगसँगै प्रभावित समुदायको तत्कालीन आवश्यकता पूरा गर्ने प्रयासलाई निरन्तरता दिइएको कम्पनीले उल्लेख गरेको छ।
