काठमाडौं। नेपाल यातायात व्यवसायी राष्ट्रिय महासंघका अध्यक्ष पुण्यप्रसाद सिटौलाले विद्युतीय माइक्रोबसको सिट क्षमता परिवर्तन, रुट परमिट वितरण र रात्रिकालीन सेवा सञ्चालनका विषयमा निष्पक्ष छानबिनको माग गरेका छन् ।
उनले शुक्रबार सामाजिक सञ्जालमार्फत विद्युतीय सवारीसाधनको प्राविधिक मापदण्ड र कानूनी प्रक्रियामाथि प्रश्न उठाएका हुन् ।
सिटौलाले शुरूमा ९ सिट क्षमताका रूपमा स्वीकृति पाएका सवारीसाधनलाई कुन प्राविधिक आधार र कानूनी प्रक्रियाअन्तर्गत ११ सिटमा परिणत गरियो भन्ने प्रश्न गरेका छन् । यात्रु सुरक्षाका लागि सिट संख्या निर्धारण गरिएको हो वा अन्य कुनै दबाबमा यस्तो निर्णय गरिएको हो भन्ने विषयमा उनले स्पष्ट पार्न माग गरेका छन् ।
यस विषयमा यातायात व्यवस्था विभाग, प्रदेश सरकार र सम्बन्धित यातायात कार्यालयहरूलाई पटक-पटक ध्यानाकर्षण गराउँदा पनि सुनुवाइ नभएको उनको भनाइ छ । तोकिएको सीमाविपरीत परमिट वितरण गरिएको भए त्यसको जिम्मेवारी कसले लिने भन्ने प्रश्न उठाउँदै उनले दोषीमाथि कारबाहीको माग गरेका छन् ।
साथै, विद्युतीय माइक्रोबसको प्राविधिक अवस्था, ब्याट्री, ब्रेक प्रणाली र समग्र सुरक्षा मापदण्डको तत्काल परीक्षण गर्न उनले आग्रह गरेका छन् । भविष्यमा दुर्घटना हुन नदिन स्पष्ट नीति, मापदण्ड र प्रभावकारी नियमनको व्यवस्था गर्नुपर्नेमा उनले जोड दिएका छन् ।
