काठमाडौं- स्वतन्त्र सांसद महावीर पुनले नवप्रवर्तन प्राधिकरण गठन गर्न सरकारसँग माग गर्नुभएको छ । प्रतिनिधिसभा बैठकमा मंगलबार धारणा राख्दै उहाँले सो माग राख्नुभएको हो ।
संसद बैठकमा आफूलाई स्वतन्त्र सांसद भनेर ५ मिनेट समय निर्धारण गरेकोप्रति उहाँले आपत्ति जनाउनुभयो । आफू स्वतन्त्र सांसद भए पनि समर्थक दलको सदस्यहरुभन्दा बढी रहेको उहाँले दावी गर्नुभयो ।
नीति तथा कार्यक्रममा ‘विज्ञान’ भन्ने शब्द उल्लेख नरहेको भन्दै उहाँले भन्नुभयो, “अहिलेको युवाहरुले बनाएको सरकारले समेत विज्ञान शब्दप्रति के को रिस हो ? खै सम्बोधन गरेको ?” उहाँले आपत्ति जनाउनुभयो । विज्ञान प्रविधि, नवप्रवर्तन विषयमा ध्यान दिन उहाँले सरकारको ध्यानाकर्षण गराउनुभयो ।
विज्ञान प्रविधिको सम्बोधनविना देशको अर्थतन्त्र बलियो बन्न नसक्ने भन्दै उहाँले त्यसमा ध्यान दिन सरकारसँग आग्रह गर्नुभयो ।
