काठमाडौं । सिटिजन्स बैंकले आर्थिक वर्ष २०८२/८३ मा खुद नाफा ६३.०५ प्रतिशतले बढाउँदै २ अर्ब ९ करोड ८६ लाख रुपैयाँ पुर्याएको छ । अघिल्लो आर्थिक वर्षमा बैंकको खुद नाफा १ अर्ब २८ करोड ७१ लाख रुपैयाँ थियो । यससँगै बैंकको खुद नाफा एक वर्षमै ८१ करोड १५ लाख रुपैयाँभन्दा बढीले बढेको छ ।
नाफामा उल्लेख्य वृद्धि भएसँगै बैंकको प्रतिसेयर आम्दानी (ईपीएस) पनि ८ रुपैयाँ ७१ पैसाबाट बढेर १३ रुपैयाँ ५३ पैसा पुगेको छ । यसले बैंकको प्रतिशेयर आम्दानी क्षमतामा सुधार आएको देखाउँछ ।
बैंकको नाफा वृद्धिमा मुख्य भूमिका नोक्सानी व्यवस्थापन खर्चमा आएको कमीले खेलेको देखिन्छ । अघिल्लो आर्थिक वर्षमा २ अर्ब ६८ करोड रुपैयाँ रहेको इम्पेयरमेन्ट चार्ज चालु आर्थिक वर्षमा ८२ करोड ९४ लाख रुपैयाँमा झरेको छ । अर्थात् इम्पेयरमेन्ट चार्ज ६९.०५ प्रतिशतले घटेको छ । करिब १ अर्ब ८५ करोड रुपैयाँको यस्तो खर्च घट्दा बैंकको खुद नाफामा प्रत्यक्ष सकारात्मक प्रभाव परेको हो ।
यस्तै, बैंकको निक्षेप लागत ४.४९ प्रतिशतबाट घटेर ३.३६ प्रतिशतमा आएको छ भने आधार दर ६.२५ प्रतिशतबाट घटेर ५.०४ प्रतिशत कायम भएको छ । फन्डिङ लागत र आधार दरमा आएको कमीले बैंकको ब्याजदर व्यवस्थापनमा सुधार भएको संकेत गर्छ ।
बैंकको खुद शुल्क तथा कमिसन आम्दानी ६.३३ प्रतिशतले बढेको छ । त्यस्तै, नेट ट्रेडिङ तथा अन्य सञ्चालन आम्दानी ५१.१२ प्रतिशतले वृद्धि भएको छ । यसले ब्याज आम्दानीबाहेकका आम्दानी स्रोतमा समेत सुधार आएको देखाउँछ ।
पूँजीतर्फ पनि बैंकको स्थिति केही बलियो बनेको छ । टायर–१ क्यापिटल एडिक्वेसी रेसियो अघिल्लो आर्थिक वर्षको ८.९५ प्रतिशतबाट बढेर ९.२३ प्रतिशत पुगेको छ । समग्र क्यापिटल एडिक्वेसी रेसियो भने १२.४७ प्रतिशत कायम छ ।
तर, खुद नाफा २ अर्ब रुपैयाँभन्दा माथि पुगे पनि बैंकको वितरणयोग्य नाफा भने तुलनात्मक रूपमा निकै कम छ । नेपाल राष्ट्र बैंकको नियामकीय व्यवस्था तथा आवश्यक समायोजनपछि बैंकको वितरणयोग्य नाफा ५२ करोड ३१ लाख रुपैयाँमा सीमित भएको छ । यो चुक्ता पूँजीको ३.३७ प्रतिशत बराबर हो ।
खुद नाफा र वितरणयोग्य नाफाबीच ठूलो अन्तर देखिनुको मुख्य कारण नियामकीय समायोजन हो । बैंकले डिफर्ड ट्याक्स एसेट्समा ४३ करोड ३८ लाख रुपैयाँ तथा गैरबैंकिङ सम्पत्ति (एनबीए) मा २९ करोड १० लाख रुपैयाँ बराबरको समायोजन गरेको छ ।
त्यस्तै, इन्ट्रेस्ट रिसिभेबल, एक्चुरियल लस, इन्ट्रेस्ट क्यापिटलाइज्ड रिजर्भलगायतका अन्य नियामकीय शीर्षकमा समेत आवश्यक समायोजन गरिएको छ ।
यसरी हेर्दा सिटिजन्स बैंकको सञ्चालन तथा नाफा क्षमतामा उल्लेख्य सुधार देखिए पनि नियामकीय समायोजनका कारण वितरणयोग्य नाफा भने ५२ करोड ३१ लाख रुपैयाँमा सीमित भएको छ । खुद नाफा, ईपीएस, इम्पेयरमेन्ट खर्च, निक्षेप लागत र आधार दरमा आएको सुधार बैंकको वित्तीय प्रदर्शनका प्रमुख सकारात्मक पक्ष बनेका छन् ।
