रसुवा। भोटेकोशी नदीमा बुधबार आएको विनाशकारी बाढीबाट प्रभावित रसुवा, नुवाकोट र धादिङमा दूरसञ्चार सेवा पुनःस्थापित गर्न सेवाप्रदायकहरूले प्राविधिक टोली परिचालन गरी काम तीव्र बनाएका छन् ।
बाढीका कारण क्षतिग्रस्त मोबाइल टावर, फाइबर लिंक तथा अन्य पूर्वाधार मर्मत गरेर सेवा सञ्चालनमा ल्याउने कामलाई नेपाल टेलिकम र एनसेलले प्राथमिकतामा राखेका छन् ।
नेपाल टेलिकमले बिहीबार हेलिकोप्टरमार्फत प्राविधिक कर्मचारी परिचालन गरी रसुवा सदरमुकाम धुन्चेमा मोबाइल स्टेसन सञ्चालनमा ल्याएको थियो । शुक्रबार पनि प्राविधिक टोली प्रभावित क्षेत्रमा पुगेर बन्द रहेका साइट पुनः सञ्चालन गर्ने काममा खटिएको टेलिकमले जनाएको छ ।
टेलिकमका अनुसार रसुवाको गोसाइँकुण्ड गाउँपालिका–५ स्थित गोलजुङ मोबाइल टावर (बाहुनडाँडा) पुनः सञ्चालनमा आएपछि स्याफ्रुबेँसी, पार्वतीकुण्ड गाउँपालिका–४ र ५, गोसाइँकुण्ड गाउँपालिका–३ र ५ तथा स्याफ्रुबेँसी–टिम्मुरे सडकखण्डका केही क्षेत्रमा मोबाइल सेवा सुचारु भएको छ ।
त्यस्तै, नुवाकोटको सूर्यगढी गाउँपालिका–३ स्थित गेर्खु मोबाइल टावर सञ्चालनमा ल्याइएपछि विदुर नगरपालिका–१० र ११ तथा सूर्यगढी गाउँपालिका–४ का केही क्षेत्रमा पनि दूरसञ्चार सेवा पुनःस्थापित भएको कम्पनीले जनाएको छ ।
विदुर नगरपालिका–८ स्थित तुप्चे टावर र गोसाइँकुण्ड गाउँपालिका–२, टिमुरेभन्दा माथिको डाँडामा रहेको टावरमा भने हेलिकोप्टरमार्फत जेनेरेटर, इन्धन र प्राविधिक टोली पुर्याएर सेवा सञ्चालन गर्ने काम भइरहेको टेलिकमले जनाएको छ ।
टेलिकमका अनुसार बाढीबाट प्रभावित तीन जिल्लाका कुल १२० साइटमध्ये हालसम्म ८० साइटमा सेवा पुनः सञ्चालन भइसकेको छ ।
एनसेलका १९ साइट पुनः सञ्चालन
निजी क्षेत्रको दूरसञ्चार सेवाप्रदायक एनसेलले पनि बाढी प्रभावित तीन जिल्लामा आफ्नो नेटवर्क पुनःस्थापनालाई तीव्र बनाएको छ ।
बाढीका कारण प्रभावित २७ साइटमध्ये बिहीबार रसुवाका तीन, नुवाकोटका आठ र धादिङका तीन गरी १४ साइट सञ्चालनमा ल्याएको एनसेलले जनाएको छ । शुक्रबार थप पाँच साइट सञ्चालनमा आएसँगै पुनःस्थापित साइटको संख्या १९ पुगेको कम्पनीले जनाएको छ ।
बाढीका कारण करिब ७० देखि ८० किलोमिटर क्षेत्रमा फाइबर लिंकमा क्षति पुगेपछि एनसेलका २७ मोबाइल साइट प्रभावित भएका थिए । नेटवर्क पुनःस्थापनाका लागि कम्पनीले सम्भव भएका स्थानमा क्षतिग्रस्त फाइबर मर्मत गर्नुका साथै वैकल्पिक रूपमा पुराना माइक्रोवेभ लिंकसमेत प्रयोग गरिरहेको जनाएको छ ।
एनसेलले प्राविधिक टोलीलाई हवाई तथा सडकमार्गबाट प्रभावित क्षेत्रमा परिचालन गरेको छ । तत्काल सञ्चार पहुँच कायम राख्न कम्पनीले प्रभावित क्षेत्रमा थप तीनदेखि सात दिनसम्म निःशुल्क डेटा र भ्वाइस सेवा उपलब्ध गराउने जनाएको छ ।
बाढीपछि सडक, पुल र विद्युत् संरचनासमेत प्रभावित भएकाले दूरसञ्चार पूर्वाधार मर्मत चुनौतीपूर्ण बनेको छ । त्यसका बाबजुद सेवाप्रदायकहरूले वैकल्पिक ऊर्जा, हवाई उद्धारमार्फत उपकरण ढुवानी र वैकल्पिक नेटवर्क प्रविधि प्रयोग गरेर प्रभावित क्षेत्रमा सञ्चार सेवा पुनःस्थापित गर्ने प्रयास गरिरहेका छन् ।
