काठमाडौं: सरकारले उखुको न्यूनतम समर्थन मूल्य नतोकेपछि देशभरका उखु किसानहरू आक्रोशित बनेका छन्। चिनी उद्योगहरूले मिल सञ्चालनको तयारी गरिरहँदा कृषि, वन तथा पर्यावरण मन्त्रालयले उत्पादन लागतमा सामान्य वृद्धि मात्र देखाएपछि किसानहरूले असन्तुष्टि जनाएका छन्।
उखु किसान महासंघका अध्यक्ष श्याम रायले मन्त्रालयले किसानको वास्तविक उत्पादन लागतलाई बेवास्ता गर्दै अपमानजनक प्रस्ताव अगाडि सारेको आरोप लगाएका छन्। मन्त्रालयले देशभरबाट लागत संकलन गरे पनि हालैको बैठकमा लागत जम्मा ८ रुपैयाँले मात्र बढेको तथ्यांक प्रस्तुत गरेपछि किसान प्रतिनिधिहरूले बैठक नै बहिष्कार गरेका थिए। मन्त्रालयको उक्त प्रस्ताव आफूहरूलाई कुनै हालतमा मञ्जुर नभएको रायले स्पष्ट पारेका छन्।
किसानहरूले बजारमा चिनीको मूल्यमा भएको अस्वाभाविक वृद्धिलाई आधार मानेर समर्थन मूल्य तोक्नुपर्ने माग गरेका छन्। गत वर्ष चिनीको मूल्य प्रतिकिलो ७० देखि ७५ रुपैयाँ रहेकोमा अहिले बढेर १२० देखि १३० रुपैयाँ पुगेको छ। उद्योगीहरूले नै उद्योगबाट प्रतिकिलो ११५ देखि ११७ रुपैयाँमा चिनी बिक्री गरिरहेको महासंघको भनाइ छ। यसअघि उखुको मूल्य प्रतिक्विन्टल ६९० रुपैयाँ थियो, जसमा ६२० रुपैयाँ उद्योगले र ७० रुपैयाँ सरकारले अनुदानबापत दिने व्यवस्था थियो।
महासंघले आगामी ५ गतेसम्ममा वैज्ञानिक आधारमा मूल्य नतोकिए कडा आन्दोलन गर्ने चेतावनी दिएको छ। यस वर्ष देशभर करिब २ करोड २५ लाख क्विन्टल उखु उत्पादन हुने अनुमान गरिएको छ।
