काठमाडौँ- चालु आर्थिक वर्ष २०८२/८३ को ११ महिनामा नेपालको अर्थतन्त्रका अधिकांश सूचक सकारात्मक देखिएका छन् । विदेशी विनिमय सञ्चिति, शोधनान्तर स्थिति र विप्रेषण आप्रवाहमा उल्लेखनीय सुधार आउँदा मुद्रास्फीति नियन्त्रणमा रहेको नेपाल राष्ट्र बैङ्कले जनाएको छ ।
चालु आव २०८२/८३ को जेठ महिनामा वार्षिक विन्दुगत उपभोक्ता मुद्रास्फीति ५.२२ प्रतिशत र आर्थिक वर्षको ११ महिनाको औसत मुद्रास्फीति २.८९ प्रतिशत रहेको छ ।
कुल विदेशी विनिमय सञ्चिति ३७ खर्ब ५५ अर्ब ६४ करोड रहेको छ । अमेरिकी डलरमा उक्त सञ्चिति २४ अर्ब ६८ करोड पुगेको छ । यस्तो सञ्चिति १९.१ महिनाको वस्तु तथा सेवा आयात धान्न पर्याप्त छ ।
चालु खाता आठ खर्ब दुई अर्ब छ करोड र शोधनान्तर नौ खर्ब २६ अर्ब छ करोड बचतमा रहेको छ । निर्यात १२.३ प्रतिशतले र आयात १५.२ प्रतिशतले बढेको छ ।
नेपाल सरकारको खर्च १३ खर्ब ४६ अर्ब ६५ करोड र राजस्व परिचालन १० खर्ब ८१ अर्ब ३१ करोड रहेको छ । विस्तृत मुद्राप्रदाय ९.८ प्रतिशतले बढेको छ । वार्षिक विन्दुगत आधारमा यस्तो मुद्राप्रदाय १४.२ प्रतिशतले बढेको छ । बैङ्क तथा वित्तीय संस्थाको निक्षेप परिचालन १०.३ प्रतिशत र निजी क्षेत्रमा प्रवाहित कर्जा ६.२ प्रतिशतले बढेको छ । वार्षिक विन्दुगत आधारमा निक्षेपको वृद्धिदर १५ प्रतिशत र निजी क्षेत्रमा प्रवाहित कर्जाको वृद्धिदर ६.५ प्रतिशत रहेको छ ।
बैङ्क तथा वित्तीय संस्थाबिचको भारित औसत अन्तरबैङ्क दर २.७३ प्रतिशत र ९१ दिन अवधि भएको ट्रेजरी बिलको भारित औसत ब्याजदर २.६४ प्रतिशत रहेको छ । वाणिज्य बैङ्कको निक्षेपको भारित औसत ब्याजदर ३.२९ प्रतिशत र कर्जाको भारित औसत ब्याजदर ६.६४ प्रतिशत रहेको छ ।
रेमिट्यान्स आप्रवाह २१ खर्बमाथि
समीक्षा अवधिमा रेमिट्यान्स आप्रवाह ३८.२ प्रतिशतले वृद्धि भई २१ खर्ब २० अर्ब ८० करोड रुपियाँ पुगेको छ । अघिल्लो वर्षको सोही अवधिमा रेमिट्यान्स आप्रवाह १५.६ प्रतिशतले बढेको थियो । गत जेठ महिनामा रेमिट्यान्स आप्रवाह दुई खर्ब तीन अर्ब ८९ करोड रुपियाँ रहेको छ । अघिल्लो वर्षको सोही महिनामा रेमिट्यान्स आप्रवाह एक खर्ब ७६ अर्ब ३२ करोड रहेको थियो ।समीक्षा अवधिमा अमेरिकी डलरमा रेमिट्यान्स आप्रवाह २९.६ प्रतिशतले वृद्धि भई १४ अर्ब ५९ करोड पुगेको छ । अघिल्लो वर्ष यस्तो आप्रवाह १२.८ प्रतिशतले बढेको थियो । समीक्षा अवधिमा खुद द्वितीय आय (खुद ट्रान्सफर) २३ खर्ब २१ अर्ब सात करोड पुगेको छ । अघिल्लो वर्षको सोही अवधिमा यस्तो आय १६ खर्ब ६९ अर्ब ५१ करोड रहेको थियो ।
