काठमाडौं: चितवनको कुरिनटारबाट गोरखाको प्रसिद्ध मनकामना मन्दिर जोड्ने मनकामना केबलकार सेवा मङ्गलबार एक दिनका लागि बन्द हुने भएको छ। चाडपर्व अगावै गर्नुपर्ने नियमित मर्मतसम्भारका कारण सेवा स्थगित गर्न लागिएको सञ्चालक कम्पनी मनकामना दर्शन प्रालिले जनाएको छ।
कम्पनीका नायब महाप्रबन्धक उज्ज्वल शेरचनका अनुसार मङ्गलबार केबलकारका टावरहरूको निरीक्षण तथा मर्मत गरिनुका साथै दुवै स्टेसनको प्राविधिक परीक्षण गरिनेछ। मर्मतको काम सकिएपछि बुधबारदेखि सेवा पुनः नियमित रूपमा सञ्चालनमा आउनेछ।
सेवा बन्द रहनेबारे कम्पनीले सामाजिक सञ्जालमार्फत समेत सूचना सार्वजनिक गरिसकेको छ। सेवा रोकिँदा यात्रु तथा भक्तजनलाई पर्न जाने असुविधाप्रति मनकामना दर्शन प्रालिले क्षमा मागेको छ।
