सुर्खेत। संघ, प्रदेश र स्थानीय तहको लागत साझेदारीमा निर्माण भइरहेको भेरी पम्पिङ खानेपानी आयोजनाको प्याकेज–२ को खरिद प्रक्रिया रद्द भएको छ ।
विश्व बैंकले ई–जीपी प्रणालीको विश्वसनीयता र सुरक्षामाथि प्रश्न उठाउँदै प्रक्रिया रद्द गरी पुनः बोलपत्र आह्वान गर्न नेपाल सरकारलाई सिफारिस गरेको हो । बैंकले आयोजनाको बोलपत्रमा प्रत्यक्ष अनियमितता भएको भने जनाएको छैन ।
प्याकेज–२ अन्तर्गत वीरेन्द्रनगरका घरधुरीमा पाइप सञ्जाल विस्तार, धारा जडान तथा आयोजना सञ्चालन प्रणाली निर्माणका लागि ग्लोबल टेन्डर आह्वान गरिएको थियो । बोलपत्र मूल्यांकन भइरहेका बेला सरकारी ई–जीपी प्रणालीको सुरक्षामाथि प्रश्न उठेपछि बैंकले नयाँ प्रक्रिया अघि बढाउन सुझाव दिएको हो ।
विश्व बैंकले ७ अगस्ट २०२६ मा अर्थ मन्त्रालयलाई पठाएको पत्रमा ई–जीपी प्रणालीको समस्याले खरिद प्रक्रियाको पारदर्शिता, निष्पक्षता र प्रतिस्पर्धात्मक निष्ठामा असर पर्न सक्ने उल्लेख गरेको छ । नयाँ प्रक्रियामा विद्युतीय माध्यमको सट्टा हार्डकपीबाट बोलपत्र बुझाउने व्यवस्था गरिनेछ ।
यसअघि सीआईबीले ई–जीपी प्रणालीमा अनधिकृत प्रवेश गरी ठेक्काका विवरण हेरफेर गरेको आरोपमा निर्माण व्यवसायी तथा राप्रपा नेता विक्रम पाण्डेसहितका व्यक्तिलाई पक्राउ गरेको थियो ।
विश्व बैंकले पुनः बोलपत्र गर्दा केही ढिलाइ भए पनि आयोजना अवधि थप गर्न सहयोग गर्ने जनाएको छ । बोलपत्रको म्याद १७ अगस्टमै सकिएकाले प्रक्रिया तत्काल अघि बढाउन बैंकले आग्रह गरेको छ ।
करिब ४० प्रतिशत भौतिक प्रगति भएको आयोजनाले भेरी नदीबाट प्रतिसेकेन्ड ५६० लिटर पानी लिफ्ट गरी वीरेन्द्रनगरका घरधुरीमा पुर्याउने लक्ष्य राखेको छ । आयोजनामा संघको ८०, प्रदेशको १३ र वीरेन्द्रनगर नगरपालिकाको ७ प्रतिशत लागत साझेदारी छ ।
आयोजना इकाइ प्रमुख रवीन्द्र रायका अनुसार नयाँ खरिद प्रक्रिया ६–७ महिनाभित्र टुंग्याउने लक्ष्यसहित प्रक्रिया सुरु भइसकेको छ ।
