वासिङ्टन। संयुक्त राज्य अमेरिकाले क्यानाडाली वस्तुमाथि थप शुल्क लगाएपछि क्यानाडाले मङ्गलबार त्यसको जवाफी कदम घोषणा गर्ने भएको छ । दुई देशबीच हप्तौँसम्म चलेको वार्ता नयाँ अमेरिकी शुल्क रोक्ने सहमतिमा पुग्न नसकेपछि व्यापारिक तनाव थप चुलिएको हो ।
अमेरिकी राष्ट्रपति डोनाल्ड ट्रम्पले सोमबार क्यानाडाबाट आयात हुने मोटरमा अर्को वर्षदेखि शुल्क बढाएर ५० प्रतिशतसम्म पुर्याउने बताउनुभएको छ । यसअघि क्यानाडाली मोटरमा गैरअमेरिकी सामग्रीका लागि २५ प्रतिशत शुल्क थियो । अमेरिकाले क्यानाडाली वस्तुमाथि ५० प्रतिशतसम्मको नयाँ शुल्क शनिबारदेखि लागू गरेको थियो ।
क्यानाडाका प्रधानमन्त्री मार्क कार्नीले यसअघि अमेरिकी कदमको जवाफमा सेप्टेम्बर ८ देखि लागू हुने प्रतिशोधात्मक शुल्क घोषणा गर्नुभएको थियो । त्यसमा अमेरिकी स्टिल, दुग्धजन्य पदार्थ, कृषि उपकरण, कागज र विद्युतीय सामग्रीलगायत वस्तु समेटिएका छन् । उनले अमेरिकी वार्ताकारले मोटर, स्टिल र आल्मुनियमजस्ता क्यानाडाका प्रमुख उद्योगलाई असर पार्ने अनुचित सर्त अघि सारेको आरोप लगाएको छ ।
क्यानाडाको कुल निर्यातमध्ये करिब ७० प्रतिशत अमेरिकी बजारमा जाने भएकाले व्यापार विवादले क्यानाडाली उद्योग र रोजगारीमा असर पार्ने चिन्ता बढेको छ । एङ्गस रिड इन्स्टिच्युटको सर्वेक्षणमा चारमध्ये तीन क्यानाडालीले अमेरिकी दबाबका बाबजुद व्यापार वार्ताबाट पछि नहट्ने सरकारको निर्णयलाई समर्थन गरेका छन् भने पाँचमध्ये करिब दुई जनाले रोजगारीबारे चिन्ता व्यक्त गरेका छन् ।
ओन्टारियोका प्रिमियर डग फोर्डले अमेरिकी मोटर शुल्कको विरोध गर्दै आवश्यक परे अमेरिकातर्फ निर्यात हुने विद्युत्मा अधिभार लगाउन सकिने चेतावनी दिए । यसअघि ओन्टारियोले तीन अमेरिकी राज्यमा विद्युत् निर्यातमा २५ प्रतिशत अधिभार लगाएको थियो ।
ह्वाइट हाउसले क्यानाडाले अमेरिकी मदिरा, मोटर र दुग्धजन्य पदार्थमा भेदभावपूर्ण शुल्क लगाएको आरोप लगाएको छ । पछिल्लो अमेरिकी शुल्कले करिब ५।५ प्रतिशत क्यानाडाली वस्तु प्रभावित हुने र त्यसको मूल्य करिब २० अर्ब अमेरिकी डलर रहेको बताइएको छ ।
यसैबीच, दुई देशले संयुक्त राज्य अमेरिका–मेक्सिको–क्यानाडा स्वतन्त्र व्यापार सम्झौता (युएसएमसीए) को संशोधनसम्बन्धी विषय पनि टुङ्ग्याउनुपर्नेछ । राष्ट्रपति ट्रम्पले सम्झौतालाई वर्तमान स्वरूपमा नवीकरण नगर्ने बताउँदै आएको छ । पछिल्लो विवादले लामो समयदेखि निकट सम्बन्धमा रहेका दुई छिमेकीबीच आर्थिक तथा राजनीतिक तनाव थप बढाएको छ ।
