बैतडी । बैतडीका चार स्थानीय तहले भोटेकोशी बाढीप्रभावित परिवारको राहत तथा उद्धारका लागि नौ लाख आर्थिक सहयोग गर्ने घोषणा गरेका छन् । स्थानीय पाटन, दशरथचन्द नगरपालिका, शिवनाथ र सिगास गाउँपालिकाले बाढी प्रभावितको राहत तथा उद्धारका लागि उक्त रकम सहयोग गर्ने निर्णय गरेका हुन् ।
रसुवा बाढी प्रभावितलाई दशरथचन्द नगरपालिकाले रु तीन लाख उपलब्ध गराउने नगरप्रमुख पुष्करराज जोशीले जानकारी दिए ।
पाटन नगरपालिकाले बाढीपीडितको राहत तथा उद्धारका लागि आर्थिक सहयोग गर्ने जनाएको छ । नगरप्रमुख गौरीसिंह रावलले प्रधानमन्त्री दैवी प्रकोप उद्धार कोषमा दुई लाख ५० हजार जम्मा गर्ने जानकारी दिए ।
त्यस्तै, शिवनाथ गाउँपालिकाले पनि भोटेकोशी बाढीपीडितका लागि रु दुई लाख सहयोग गर्ने भएको छ । विपद् व्यवस्थापन समितिको निर्णयअनुसार प्रधानमन्त्री दैवी प्रकोप उद्धार कोषमा उक्त रकम जम्मा गरिने गाउँपालिका अध्यक्ष कर्णसिंह साउदले जानकारी दिए ।
यस्तै सिगास गाउँपालिकाले पनि प्रधानमन्त्री दैवी प्रकोप उद्धार कोषमा रु एक लाख र प्रधानमन्त्री राहत कोषमा रु ५० हजार गरी एक लाख ५० हजार सहयोग उपलब्ध गराउने निर्णय गरेको छ । बाढी प्रभावितको खोज, उद्धार, राहत तथा पुनःस्थापनाका लागि गाउँपालिकाले आर्थिक सहयोग गर्ने निर्णय गरेको गाउँपालिका अध्यक्ष हरिसिंह धामीले बताए ।
